Pogradeci u bë sërish skena e një prej aktiviteteve më të veçanta për fëmijët, duke mirëpritur për të tretin vit radhazi “Maratonën e Bebave”.
Mbi 80 vogëlushë nga qyteti dhe zona të tjera të vendit morën pjesë në këtë garë të mbushur me buzëqeshje, hare dhe emocion familjar.
Aktiviteti, tashmë i kthyer në një traditë në qytetin buzë liqenit, solli në skenën e Odeonit qindra familje që ndoqën me entuziazëm garën e veçantë, e cila u zhvillua në dy kategori: fëmijët që ecin dhe ata që zvarriten.
Spektakli i foshnjave që “garonin” drejt finishit, të shtyrë nga tundja e lodrave të preferuara nga prindërit apo thirrjet e gjyshërve, u kthye në një festë të vërtetë për të gjithë të pranishmit.
Në përfundim të aktivitetit, u ndanë 15 çmime për fituesit e vendeve të para, të dyta dhe të treta. Megjithatë, çdo pjesëmarrës u nderua me medalje, dhurata simbolike dhe duartrokitje, duke e bërë çdo fëmijë të ndihet fitues.
Përtej garës, “Maratona e Bebave” ka një mision më të thellë: të sjellë bashkë komunitetin, të promovojë lidhjen mes brezave dhe të ofrojë një ditë të paharrueshme për fëmijët dhe familjet e tyre.
Ky aktivitet i paraprin gjithashtu maratonës ndërkombëtare të vrapit “Enkelana”, duke sjellë frymën sportive dhe festive që prej moshave më të vogla.
