Ashtu siç ishte parashikuar, ka nisur në Kryesinë e Kuvendit mbledhja e Konferencës së Kryetarëve ku do të diskutohet për kërkesat e PD për ngritjen e 2 komisioneve hetimore për rrjedhjen e të dhënave nga TIMS dhe koncesionet në shëndetësi, si sterilizimi dhe check-upi.
Mësohet se Gazment Bardhit në mbledhje ka theksuar se nëse maxhoranca ka pretendime për objektin e kërkesave, i ftoi që ta riformulojnë.
“Nëse keni pretendime për objektin, hajdeni ta riformulojmë. Por ju kërkoni të mohoni të drejtën e opozitës, duke shkelur kushtetutën e Shqipërisë. Po shkelni çdo parim demokratik, duke i mohuar opozitës çdo hapësirë. Është kushtetuta, që i garanton opozitës të drejtat për komisionet hetimore.”, tha Bardhi.
