Rreth 32 mijë maturantë ditën e sotme po zhvillojnë testin e Matematikës për Maturën Shtetërore, por tashëm teza është bërë publike.
Në një postim në Facebook, ish-deputetja e PD, Albana Vokshi ka publikuar foto dhe thotë se ministria ka dështuar sërish.
Vokshi në reagimin e saj shprehet se testi i Matematikës është zbuluar dhe ministrja e arsimit, Besa Shahini duhet të mbajë përgjegjësi.
“Edhe #testin e #matematikës opozita e nxori?
U tha me bujë të madhe nga Ministrja e Arsimit, Besa Shahini, se testi i matematikës është hermetik se janë marre masa të mos dalë dhe të tjera broçkulla si këto.
Ka 3 ditë që për të mbuluar dështimin e saj, sulmon opozitën, por prapë dështoi.
Thirri mësuesit në oborrin e shkollës, duke rrezikuar shëndetin e tyre për të bërë shoë me masat gjoja të forta antikopjim, u hoqi celularët, i detyroi të firmosin deklarata për pushim nga puna, në rast të shkeljes së rregullave dhe çfarë bëri? Asgjë!
Turi mund t’ia kishte dalë mbanë kësaj situate më mirë sesa e dështuara Besa Shahini dhe shefi i saj Edi Rama.
Testi i matematikës është zbuluar dhe Besa Shahini duhet të mbajë përgjegjësi”, shkruan Vokshi.
Kujtojmë që prej tre ditësh, maturantët kanë protestuar përpara Ministrisë së Arsimit.
Ata shprehen të pakënaqur për hartimin e testit të Gjuhë-Letërsisë.
E ndërsa sot janë vetë nxënësit ata që e kanë fotografuar tezën me celular dhe e kanë shpërndarë në rrjetet sociale.
Edhe pse aparatet celularë janë të ndaluar gjatë provimeve, mesa duket nxënësit nuk janë kontrolluar mirë.
Ky rast është denoncuar edhe nga avokati Altin Goxhaj, pas, ish-deputetes së PD, Albana Vokshit.
Pas provimit maturantët kanë paralajmëruar sërish protestë përpara Ministrisë së Arsimit.
https://www.facebook.com/AvAltinGoxhaj/posts/347640729536044
