Ministria e Arsimit ka bërë publike rregulloren dhe kalendarin zyrtar të provimeve të Maturës Shtetërore 2026 për maturantët e arsimit të mesëm të përgjithshëm dhe profesional. Lajmi u njoftua përmes një postimi në rrjetet sociale nga ministrja e Arsimit, Mirela Kumbaro, e cila theksoi se procesi do të zhvillohet mbi rregulla të qarta dhe me garë të drejtë për të gjithë nxënësit.
Sipas kalendarit të publikuar, provimet do të zhvillohen në këto data:
-
Më 2 qershor do të mbahet provimi i gjuhës së huaj
-
Më 9 qershor provimi i gjuhës shqipe dhe letërsisë
-
Më 16 qershor provimi i matematikës
-
Më 23 qershor provimi me zgjedhje
Paralelisht me kalendarin, Ministria e Arsimit ka publikuar edhe testet model, të cilat synojnë të orientojnë maturantët gjatë përgatitjes për provimet përfundimtare. Këto materiale janë shpërndarë për t’u ardhur në ndihmë nxënësve në njohjen me strukturën dhe nivelin e testeve.
Rregullorja e Maturës Shtetërore parashikon penalizime për çdo shkelje të rregullave gjatë zhvillimit të provimeve. Në mesazhin e saj, ministrja Kumbaro ka bërë thirrje për përgatitje serioze dhe respektim të rregullave, duke nënvizuar se vetëm përgatitja rigoroze garanton një garë të ndershme dhe rezultate të merituara për maturantët.
