Sikur të mos mjaftonte bojkoti i futbollistëve të Superiores, Ministria e Arsimit Sporteve dhe Rinisë ka ndaluar edhe fillimin e lojërave me dorë në vendin tonë ku përfshihet volejbolli dhe basketbolli pasi sipas tyre këto janë sporte me rrezikshmëri të lartë për përhapjen e Covid-19.
Një situatë vërtetë paradoksale, pasi prej muajsh në Shqipëri është lejuar thuajse gjithçka, duke nisur që nga baret, restorantet, palestrat, transporti urban etj. Në një kohë kur thuajse të gjitha ekipet prej muajsh stërviten normalisht në palestra, e madje nuk kanë munguar as ndeshjet miqësore. Gjithashtu, nuk kanë qenë të pakta rastet kur palestrat dhe ambientet e mbyllura janë shfrytëzuar për fushata elektorale.
Në lidhje me këtë vendim të MASR-së ka reaguar dhe Federata Shqiptare e Volejbollit e cila ndjen keqardhje për këtë vendim të pakuptimtë në një kohë kur janë hapur aktivitete të tjera me më shumë rrezik.
“Ndërkohë që janë hapur e funksionojnë palestrat e “fitness”-it, qendrat tregtare, transporti publik, baret, restorantet, shkollat, kinematë, etj., Ministria e Shëndetsisë e konsideron sportin e volejbollit me rrezikshmëri të lartë në përhapjen e virusit “Covid-19”! Një gjë e tillë vjen teksa ekspertët e mjekësisë dhe shëndetit anembanë botës e kanë ulur nivelin e perceptimit të rrezikut për shumicën e sporteve në përgjithësi dhe volejbollit në veçanti.
Ajo që duhet theksuar është se kjo përgjigje e Ministrisë së Shëndetsisë nuk merr parasysh as faktin se volejbolli ka një veçanti, që ekipet janë të ndarë nga njëri-tjetri dhe lojtaret luajne ne nje fushe 162 m2 e cila ndodhet ne nje hapesire 800 m2 minimumi. Edhe elementet e tjere qe perbejne lojen e volejbollit zhvillohen ne fraksione te sekondit gje qe e ben te pamundur transmetimin e Covid-19″, thuhet në deklaratën e FSHV-së.
