Janë lënë në burg katër të arrestuarit për mashtrim kompjuterik të cilit në dy vite kishin shkaktuar një dëm prej 4 milionë euro. Gjykata ka pranuar kërkesën e prokurorisë duke i lënë në “arrest me burg” dy shtetasit e huaj dhe dy shqiptarët: Donald Anu, 34 vjeç, shtetas i Kamerunit, alias Ugochukëu Emmanuel Emereibenu 39 vjeç, shtetas i Nigerisë; Marie Goufan, 31 vjeçe, shtetase Kamerune, banuese në Tiranë; Fatbardh Danja, 40 vjeç, banues në Tiranë; Xhentil Kupe, 54 vjeç, banues në Tiranë.
Mësohet se gruaja e arrestuar në operacionin e koduar “Phishing”, Marie Estelle Goufan Atiock ka shpërthyer në lot në momentin që është dhënë vendimi dhe ka deklaruar se nuk ka pasur dijeni për veprimtarinë e jashtëligjshme. Gjithashtu ajo ka thënë se ka shkuar vetëm njëherë në bankë me Xhentil Kupen, edhe ky i akuzuar për të dëgjuar bisedën dhe për t’ia treguar më pas kamerunasit Donald Anu, i cili ishte regjistruar si një shtetas nigerian, me të cilin thotë se ka vetëm miqësi.
“Kam shkuar vetëm njëherë në bankë për të dëgjuar mbi bisedën e Xhentilit në bankë, me qëllim që t’ia transmetoja Donald Anus, pasi ai nuk di shqip.
Me Donaldin kam vetëm miqësi. S’kam pas asnjë informacion në lidhje me veprimtarinë e tyre”, ka thënë gruaja teksa ka shpërthyer në lot.
Nga ana tjetër shtetasi shqiptar Xhentil Kupe ka pranuar që ka hapur një llogari bankare, por që nuk ka pasur dijeni për aktivitetin ilegal.
Sjellim në vëmendje se për të njëjtat akuza janë shpallur në kërkim edhe 8 shtetas të huaj të cilët janë të përfshirë në këtë veprimtari kriminale. Ndërkohë nëpërmjet kompanive fiktive ata kanë arritur të mashtrojnë kompani nga 9 shtete të botës, duke nisur nga SHBA, Anglia, Lituania, Turqia e deri në Filipine. Ndërsa demi që kanë shkaktuar në dy vite është rreth 4 milionë euro.
