Ditën e sotme Gjykata e Posaçme kundër Korrupsionit dhe Krimit të Organizuar ka dhënë masën e sigurisë për 15 të arrestuarit e akuzuar për skemë mashtrimi me call center. Gjatë seancës së sotme, 5 prej të arrestuar janë lënë në burg pa afat, për 6 të tjerë burg me afat 60 ditor, ndërsa për 4 vajza u dha masa “detyrim paraqitje”.
Në përfundim të seancës që zgjati 4 orë, gjykata i la porosi Prokurorisë së Posaçme të grumbullojë prova të reja që i implikojnë të arrestuarit në skemën e mashtrimit, të cilën mendohet se e kanë ushtruar që prej vitit 2018 duke përdorur dy platformat “BrokerZ” dhe “Globalix”.
Dëmi ekonomik që u është shkaktuar shtetasve të huaj, konkretisht gjermanë, dyshohet të jetë rreth 5 milionë euro. Këta të fundit telefonoheshin nga Shqipëria dhe u premtohej se po të investonin në bursa fitimet e tyre do të rriteshin. Për një farë kohe të ardhurat rriteshin deri në momentin që qytetari investonte vlera të mëdha dhe më pas shkëputeshin kontaktet, duke përvetësuar të gjitha investimet.
Paratë që grumbulloheshin më pas kalonin në llogari offshore. Për këtë skemë mashtrimi janë proceduar në gjendje të lirë edhe 35 punonjës, ndërsa janë shpallur në kërkim 23 të tjerë. Kjo ishte masa e sigurisë për 15 të arrestuarit për mashtrimin me call-centera.
