Duke filluar që pasditen e së enjtes të paktën 60 persona janë shoqëruar nga policia për mashtrim me call-centerat.
Burime bëjnë me dije se punonjësit ishin të punësuar në emër të një kompanie izraelite te quajtur ‘RG Capital’.Operacioni është shtrirë nëpër call-centera që njihen si bursa ose me emrin “Forex”.
Procedimi penal ka nisur nga ana e Drejtorisë Qëndrore të Hetimit në Policinë e Shtetit. Operacioni ka nisur që ditën e djeshme dhe është në vijim, ndërsa punonjësit që janë shoqëruar në polici, po merren në pyetje.
Dyshohet në përfshirjen edhe të personave me shtetësi jo shqiptare ndërsa rëndon mbi ta akuza për veprën “Mashtrim kompjuterik me pasoja të rënda”.
Kujtojmë se Call center-at me bursa në Shqipëri gjejnë numra të pasurish dhe jo vetëm, sigurisht që të huaj, operatorët realizojnë telefonata, gjejnë mënyra nga më të ndryshmet për t’ua mbushur mendjen të hedhin ndonjë 5 qindëshe, një mijëshe apo edhe me dhjetëshe, në bursë. Pas hedhjes së shumës së caktuar, hapen operacione, në të cilat klienti shpreson se paratë e tij do të trefishohen apo katërfishohen, por ky nuk është qëllimi i kompanive. “Tregu rezultoi keq, paratë tuaja humbën”, kjo është fraza që shumë klientë dëgjojnë pas hapjes së ‘operacioneve’, që as ashtu nuk janë, por paratë i përfiton vetë kompania call centeriste.
Nëse është i zgjuar klienti e lë me kaq, por ka edhe nga ata që mashtrohen sërish, dhe u kërkohet të hedhin shuma të tjera me shpresën për të marrë ato të parat, por nuk e dinë se është ‘kurth’. “Nëse hidhni një 200-ëshe, ju do të mund të shpëtoni shumën që humbët më parë. Ose ktheni disa euro apo dollarë në bitcoin dhe shuma juaj do të trefishohet dhe do të keni mundësi ta tërhiqni.”,- i thotë operatori, klientit. Klienti mund të hedhë ende para, madje edhe kompania mund t’i kthejë një shumë fare të vogël. P.sh nëse hedh 10 mijë euro, i kthehen 500 euro, pasi sipas operatorit shuma është e ngrirë, gjasme, dhe nuk mund ta tërheqë shumën e trefishuar. Dhe pas marrjes së 500 qindëshes, operatori e bind klientin të hedhë edhe më shumë para, pasi shuma e tij e parë, bashkë me këtë që do të hedhë do të trefishohet.
