Më 20 maj mediat turke raportuan se biznesmeni turk, Adnan Polat, ka paditur administratorin e Flamurtarit, Sinan Idrizi, i cili është njëkohësisht partner i “Air Albania”, pasi e akuzon se nuk i ka kthyer një borxh prej 3.5 milionë dollarësh, të cilin ia dha në formë garancie.
Në një reagim të mëvonshëm, Idrizi u shpreh se lajmi ishte i sponsorizuar nga mediat turke dhe se palët kanë marrë avokatët dhe duhet parë se çfarë do të vendosë gjykata.
Së fundmi, mediat në Turqi raportojnë se ka përfunduar hetimi për Idrizin dhe në aktakuzën e përgatitur nga Prokuroria, i dyshuari Idrizi kërkohet të dënohet deri në 10 vjet burg për “mashtrim”.
Disa ditë pas publikimit të lajmit, Polat në një rrëfim për “Milliyet”, tregon se pjesëmarrës në marrëveshje, ishte edhe kryeministri Edi Rama.
Si ndodhi mashtrimi?
Turku thotë se ishte takuar me Idrizin, i cili i kishte thënë Polat se një kompani e quajtur Global Fluids International, GFI në Shqipëri po bënte një biznes shumë të fitimprurës në Shqipëri dhe ai mund ta ndihmonte nëse donte ta blinte kompaninë.
Po ashtu, në padi thuhet se Idrizi i ka thënë ish-presidentit të “Galatasaray”, se kompania do të shitje për 17 milionë dollarë dhe 3.5 milionë dollarë nevojiteshin si garanci, e cila do të kthehej, nëse shitja nuk përfundonte.
Polat kishte përgatitur edhe projekt-marrëveshjen për blerjen e aksioneve në 2016-ën, por Idrizi i kishte thënë se zyrtarët e kompanisë duan që paratë të mos kalojnë përmes bankës, por ndërmjet të besuarit.
Pas nënshkrimit të kontratës, Polat kishte depozituar paratë në llogarinë e biznesmenit, i cili i kishte thënë se projekti do të realizohej pas zgjedhjeve të 2017-ës, por shitja nuk u realizua kurrë.
