Në vijim të masave për parandalimin e përhapjes së koronavirusit, qeveria shqiptare ditën e nesërme do të ndërpresë të gjithë fluturimet me Britaninë e Madhe.
Në ishullin britanik janë shënuar 1391 raste me koronavirus, 35 viktima dhe vetëm në 24 orët e fundit janë regjistruar 330 raste të reja.
Kujtojmë se një javë më parë Shqipëria ndërpreu fluturimet dhe lundrimet me Italinë.
Ministria e Infrastrukturës dhe Energjisë njoftoi palën italiane, se nëse do të tërheqë shtetasit e saj, duhet të sjellë tragete ose avionë bosh.
Për momentin në vendin tonë numërohen 51 të prekur nga koronavirusi dhe një viktimë.
Autoritetet bëjnë me dije se 20 të infektuar ndodhen në repartin e Infektivit, 3 prej të cilëve po mbahen në terapi intensive.
Qeveria shqiptare ka ndërmarrë një sërë masash për parandalimin e koronavirusit, duke filluar nga mbyllja e lokaleve, shkollave dhe ndalimi i tubimeve.
Prej ditësh ushtria dhe policia kanë ngritur pika kontrolli për të mbikëqyrur zbatimin e urdhërave të policisë.
Transporti publik është ndërprerë, gjithashtu edhe qarkullimi i makinave private.
Mjetet e autorizuara për transportin e punonjësve do të qarkullojnë në fashat orare 06:00-08:00 dhe 16:00-17:00.
