Mbrëmjen e sotme njoftohet se nesër do të organizohet një protestë paqësore në doganën e Qafë Morinës në kundërshtim të masave të qeverisë së Kosovës për hyrjen e qytetarëve të vaksinuar me doza ose me dy të tilla bashkë me testin PCR.
Njoftimi është bërë nga Rakip Matmuja, organizator i protestës, shofer i linjës së transportit Kukës-Prizren. Në këtë njoftim, u kërkohet të gjithë banorëve të Kukësit që të marrin pjesë në këtë grevë paqësore, e cila nis nesër në orën 10:00.
NJOFTIMI
Njoftohen të gjithë banorët e rrethit të Kukësit se më datë 24.01.2022, në orën 10:00 do të zhvillohet një grevë paqësore pranë Doganës së Morinit për arsye të heqjes së pengesave të lëvizjes së lirë të shtetasve shqiptarë nga ana e qeverisë së Kosovës.
Kërkojmë mbështetjen e të gjithëve pasi nuk është protestë politike, por paqësore në shërbim të komunitetit.
Organizatori i protestës
Rakip Matmuja
Njoftimi për grevë paqësore në Doganën e Morinës
Qytetarë të shumtë nga Shqipëria janë irrituar me vendimin e qeverisë së Kosovës, e cila u kërkon çdo personi që futet në territorin e Kosovës të jenë të pajisur me certifikatën e vaksinimit me 3 doza, ose me test PCR dhe dy doza vaksinash. Shumë prej tyre janë kthyer pas nga autoritetet doganore të Morinës.
Zv/ministri i Shëndetësisë së Maqedonisë së Veriut, Ilir Hasani i kërkoi ministrit të Shëndetësisë së Kosovës Rifat Latifi që të rishikojnë vendimin e fundit për lëvizjen e qytetarëve pasi e konsideron të pakuptimtë.
