Komiteti Teknik i Ekspertëve ka vendosur ditën e sotme masat e reja kufizuese për parandalimin e përhapjes së COVID-19. Nder masat e marra ishte edhe ndalimi i qarkullimit nga ora 20:00 e mbrëmjes deri në 06:00 të mnëgjesit
“Ndalimi i qarkullimit të lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.”, u njoftua në konferencën për shtyp të ditës së sotme. Por ky vendim do të jetë mjaft penalizues për bizneset, baret dhe restorantet të cilat edhe tani janë në një periudhë krize. I ftuar në emisionin “Shqipëria Live”, përfaqësuesi i Shoqatës së Bareve, Enri Jahaj ka thënë se jë vendim i tillë ishte i pritshëm. Ai ka shtuar se bizneset nuk janë ndihmuar në asnjë moment pavarësisht vështirësive.
“Ne e prisnim diçka të tillë. Që kur jemi hapur nga pandemia, nuk jam kundër që të ndihmohen shtrsat në nevojë, por bizneset nuk janë ndihmuar për asnjë sekondë. Të gjitha bar-restorantet ishin në mëshirë të fatit për të paguar qiratë, për të paguar kreditë, për të paguar sigurimet shëndetësore dhe shoqërore të punëtorëve të tyre. Nuk kemi pasur asnjë mbështetje, nëse ne jemi shpërndares të virusit më mirë të na mbyllin dy javë, të na dëmshpërblejnë për këto dy javë dhe të shohim nëse numrat (e infektimeve) do ulen apo do ngrihen.”, ka thënë Jahaj.
I pyetur nëse do të kenë shkurtim personeli Jahaj ka thënë se për momentin një gjë e tillë nuk do të ndodhë. Ai gjithashtu ka thënë se baret dhe restorantet nuk kanë pasur fitime prej marsit.
“Për momentin nuk do të kemi shkurtim personeli, për sa kohë mbyllja është lajmëruar vetëm për dy javë, pasi në Shqipëri është e vështirë edhe gjetja e personelit. Të themi atë që është, fitime nuk kemi pasur që nga marsi.” tha Jahaj.
