Policia ka nisur zbatimin e masave parandaluese të qeverisë për koronavirusin.
Në të gjithë vendin gjatë mbrëmjes së djeshme janë mbyllur 522 lokale dhe bare, 29 palestra, 65 bilardo, 21 disko e pube dhe 18 lokale me muzikë.
Për pronarët e lokaleve, që nuk zbatojnë urdhërat e policisë, do të ketë penalitete.
Njoftimi i policisë
Në zbatim të masave për moslejimin e grumbullimeve masive në ambiente të hapura apo të mbyllura, me qëllim parandalimin e përhapjes së coronavirusit, Drejtori i Përgjithshëm i Policisë së Shtetit u ka dërguar një telegram të gjitha Drejtorive Vendore të Policisë në Qarqe, për mbylljen e menjëhershme të lokaleve të natës, pubeve, diskove, palestrave e lokaleve ku ka grumbullimeve masive.
Në zbatim të këtij telegrami, prej mbrëmjes së djeshme, mbi 215 Patrulla të Përgjithshme të Policisë u angazhuan për zbatimin e këtyre masave.
Në të gjithë vendin, u mbyllën gjatë mbrëmjes së djeshme 522 lokale dhe bare, 29 palestra, 65 bilardo, 21 disko e pube dhe 18 lokale me muzike live.
Strukturat e Policisë së Shtetit do të bashkëpunojnë me Inspektoratin Shtetëror Shëndetësor, Institutin e Shëndetit Publik, Njësitë e Qeverisjes Vendore, Prefektët e Qarqeve dhe institucionet e tjera shtetërore që i ngarkon ligji.
Policia e Shtetit kërkon mirëkuptimin e pronarëve të lokaleve që të zbatojnë pa asnjë hezitim urdhrat e përcjella nga punonjësit e Policisë dhe të mos i kundërshtojnë ato, pasi moszbatimi i tyre do shoqërohet me penalitete ligjore.
Aktualisht në vendin tonë janë shënuar 10 të infektuar me koronavirus, ndërsa janë bërë 114 teste.
Ndërkohë pritet përgjigja për disa të tjerë të dyshuar që kanë rënë në kontakt me të infektuarit.
Që prej ditës së hënë, qeveria ka marrë disa masa shtrënguese për të parandaluar përhapjen e koronavirusit.
Me urdhër të kryeministrit Edi Rama, institucionet arsimore do të qëndrojnë të mbylla për dy javë.
Gjithashtu u vendos anulimi i të gjitha koncerteve, aktiviteteve kulturore dhe dëgjesave publike.
Ndërkohë që prej ditës së sotme, administrata shtetërore që mund ta bëjë punën me kompjuter do të punojë nga shtëpia.
Njëkohësisht shefi i qeverisë premtoi shpërblime prej 1000 euro për infermierët dhe 500 euro për shoferët e ambulancave dhe sanitarët.
