Pas Komunitet Mysliman edhe Kisha Katolike ka marrë masa parandaluese për përhapjen e koronavirusit.
Përmes një dekreti, Kisha Katolike ka pezulluar të gjithë aktivitetet dioqezane dhe famullitare.
Në dekret u këshillohet famullitarëve, që t’i transmetojnë meshat online, si dhe të garantojnë distancën e duhur gjatë rrëfimeve.
Kishat ndërkohë do të qëndrojnë të hapura, duke këshilluar besimtarët që të ruajnë distancën nga njëri-tjetri.
DEKRET
Fort të dashur meshtarë, rregulltarë dhe rregulltare, besimtarë,
Duke vlerësuar situatën e ditëve të fundit e krijuar nga Covid-19 në Shqipëri, duke pasur parasysh urdhëresën nr. 132, datë 08.03.2020, të Ministrisë së Shëndetësisë dhe të Mbrojtjes Sociale, po ashtu Letrën e Konferencës Ipeshkvore të datës datës 29 shkurt 2020, duke vlerësuar përvojën e kishave simotra në vende të tjera, pas konsultimit me specialistë të fushës e duke i thirrur sensit të përgjegjësisë si Ipeshkëvinj të Kishës Katolike në Shqipëri:
Dekretojmë
Pezullimin e të gjithë aktiviteteve dioqezane dhe famullitare në Kishën Katolike në Shqipëri në të cilat parashikohet pjesmarrja dhe grumbullimi i popullit deri me datë 3 prill 2020 e që konkretisht do të thotë:
– Pezullimin e të gjitha kremtimeve liturgjike, përfshirë Meshën e Shenjtë;
– Pezullimin e katekizmit, për fëmijë e të rritur;
– Pezullimin e të gjitha aktiviteteve të tjera të programuara, dioqezane dhe famullitare, me fëmijët dhe të rriturit;
– Pezullimin e të gjitha kurseve të formimit pranë qëndrave tona komunitare.
Ndërkohë, ftojmë famullitarët që:
– të kremtojnë Meshën në kapelat e tyre, duke e transmetuar atë edhe online nëpërmjet rrjeteve sociale;
– të garantojnë rrëfimin personal duke ruajtur distancat e duhura e duke garantuar edhe sekretin e bisedës;
– të garantojnë marrjen e Kungimit për të sëmurët që e kërkojnë në shtëpi dhe për ata të pranishëm, gjithmonë duke ruajtur rregullat e vendosura nga organet e shëndetësisë;
– të garantohet Sakramenti i Vajimit për të sëmurët në rastet kur kërkohet, duke ndjekur rregullat e duhura higjenike;
– të garantohen funeralet duke shmangur mbledhjen e popullit, por duke bërë lutjen në momentin e mbylljes së arkivolit dhe në momentin e vendosjes në varr;
– kishat të rrinë të hapura për lutjen personale gjatë ditës, duke informuar dhe këshilluar njerëzit që të mbajnë distancën e duhur nga njëri-tjetri.
Po ashtu ftojmë të gjithë besimtarët katolikë që të jenë të vëmendshëm dhe të dëgjueshëm ndaj rregullave dhe udhëzimeve të nxjerra nga organet përkatëse për përballimin e situatës.
Të jemi të vetëdijshëm për sakrificën që duhet të bëjmë të gjithë bashkë për të mirën e njerëzve dhe shëndetit të tyre.
Të vazhdojmë, të dashur besimtarë t’i lutemi Hyjit në familjet dhe në shtëpitë tona për këtë situatë që të kalojë sa më shpejt në vendin tonë dhe në të gjithë botën.
Ky dekret do të hyjë në fuqi nesër, e premte, 13 mars.
Dhënë nga Selia e Konferencës Ipeshkvore të Shqipërisë, me datë 12 mars 2020
Ipeshkëvinjtë e Kishës Katolike
Ndërkohë ditën e djeshme, Komuniteti Mysliman anuloi të gjitha tubimet masive dhe faljen e namazit të xhumasë.
Aktualisht në vendin tonë janë shënuar 15 të prekur dhe një viktimë nga koronavirusi.
Qeveria ka marrë një sërë masash shtrënguese për të parandaluar përhapjen e koronavirusit, duke nisur nga mbyllja e shkollave, lokaleve, ndalimi i aktiviteteve kulturore sociale.
Gjithashtu që prej ditës së djeshme ushtria ka dalë në terren, për të evidentuar personat që thyejnë rregullat e karantimit.
