Një tjetër ngjarje e rëndë në Durrës. Këtë herë një çift të moshuarish janë gjendur të gjakosur e të plagosur rëndë në banesën e tyre, ku janë dhunuar nga disa persona.
Ngjarja ka ndodhur disa minuta më parë në lagjen 15, në Spitallë të Durrësit, ku persona ende të paidentifikuar kanë hyrë në shtëpinë e çiftit dhe ka ushtruar dhunë ndaj tyre.
Kanë qenë komshinjtë ata që i kanë gjetur përtokë dhe të masakruar dhe menjëherë i kanë dërguar për në spital në gjendje të rëndë, pasi janë goditur në kokë.
Policia tashmë ka mbërritur në vendngjarje dhe është duke hetuar dy pista, atë të grabitjes ose të dhunimit nga të afërm. Për pistën e grabitjes, policia ngre dyshimet e saj, pasi duhet thënë se paratë ashtu edhe sendet prej floriri të çiftit nuk janë marrë nga grabitësit. Policia thotë se plagosja mund të ketë ardhur si pasojë e një përleshje mes tyre dhe hajdutëve, të cilët në panik e sipër janë larguar pa marrë gjë.
Nga ana tjetër nuk përjashtohet mundësia që të moshuarit të jenë bërë për spital nga ndonjë i afërm apo fqinj i tyre. Prandaj blutë e Durrësit, kanë nisur në këto momente të marrin në pyetje banorët e lagjes periferike të Durrësit, për të zbuluar nëse kishin apo jo ndonjë konflikt të moshuarit me origjinë nga Pogradeci.
