Një breshëri plumbash terrorizoi pak pas mesnate bregdetin e Velipojës, ku për pasoj mbetën të vdekur katër persona dhe u plagosën dy të tjerë. Gjithçka nisi pas sherrit mes dy familjeve për shezlongët e plazhit. Hotelet e dy familjeve ishin shumë pranë njëri tjetrit.
Përveç biznesmenit Kujtim Ferracaku dhe vëllezërve Gocaj, Xhovano dhe Edmond, humbi jetën edhe punonjësi 20-vjeçar, Myzerim Zeneli.
Ai sapo kishte nisur punë në hotel Gocaj, kur ka mbetur viktimë e breshërive të armëve. Madje dita e djeshme, ishte dita e parë e punës për të si kamarier në këtë sezon turistik. Ai rastisi të jetë i pranishëm në momentin kur dy familjet Ferracaku dhe Gocaj janë konfliktuar me armë, ndërkohë që si pasojë e plagëve nuk ka mundur të mbijetojë.
Kujtojmë gjithashtu se pak më parë Policia e Shtetit ka njoftuar se për këtë ngjarje të rëndë ka shpallur në kërkim edhe dy shtetas të tjerë, të cilët dyshohen se ishin bashkë me vëllezërit Ferracaku.
Gjithashtu bëhet e ditur se deri tani janë rreth 20 persona që shoqëruar, si shtetas që mund të kenë dijeni të mëtejshme rreth konfliktit që çoi në përplasjen me armë mes vëllezërve Ferracaku dhe Gocaj. Po ashtu mësohet se në këtë ngjarje mund të jenë përdorur deri në 6 armë.
Sipas dyshimeve paraprake, vëllezërit Ferracaku kanë pasur secili nga një pistoletë dhe dy personat në kërkim dyshohen se kanë qenë të armatosur. Nga ana tjetër edhe vëllezërit Gocaj kanë pasur njeri pistoletë dhe tjetri automatik kallashnikov.
Policia ka sekuestruar vetëm një pistoletë deri më tani dhe disa prej gëzhojave që janë nga disa armë të ndryshme.
