Drejtori i Përgjithshëm i Policisë së Shtetit, Ilir Proda, ka dhënë një paralajmërim të fortë gjatë raportimit të tij në Komisionin e Sigurisë, ku ka diskutuar për “buxhetin 2025” dhe situatën e ngjarjeve kriminale.
Ai ka konfirmuar se shumë shpejt do të zbardhet ngjarja e rëndë e masakrës së Dobraçit, e cila ndodhi në 30 tetor, dhe se Policia ka tashmë informacion për autorët e krimit, me arrestimin e tyre që pritet shumë shpejt.
Proda ka shtuar se ngjarja po hetohet nga Struktura e Posaçme Kundër Korrupsionit dhe Krimit të Organizuar, e cila ka dyshime të forta se atentati është organizuar dhe finalizuar nga një grup kriminal.
Në fjalën e tij, Proda gjithashtu ka theksuar nevojën për rritjen e aftësive profesionale të oficerëve të policisë dhe ka shpjeguar se rritja e fondit sekret është e lidhur ngushtë me ngritjen e nivelit të trajtimit dhe aftësive operative të oficerëve.
Ai ka pohuar se situata është problematike dhe se Ministria e Brendshme ka reaguar duke hapur Akademinë e Sigurisë, e cila do të japë rezultate pas disa vitesh. Proda ka nënvizuar se nuk mund të rritet fondi nëse nuk ka oficerë me aftësi dhe eksperiencë për ta shpenzuar atë në mënyrë efikase.
