Dalin detaje të reja nga konflikti me armë në Velipojë, që çoi në një masakër ku humbën jetën 4 persona. Kujtim Ferracaku 59 vjeç, pronar i hotel “Fantazia”, vëllezërve Xhovani dhe Edmond Gocaj, 25 dhe 38 vjeç, që kishin hotelin “Gocaj” dhe jetimi fatkeq, Musaen Zenelit, vetëm 20 vjeç.
Të shtunën ka pasur fillimisht një konflikt verbal mes dy familjeve pronare të hoteleve në zonën e plazhit në Velipojë, që më pas ka përfunduar deri në përplasje fizike mes Kujtim Verracakut dhe dy vëllezërve Gocaj.
Konflikt për të cilin uniformat blu të Velipojës kanë pasur dijeni, por që nuk kanë arritur ta shuajnë, nën arsyetimin se nuk është kompetencë e tyre ndarja e plazhit. Për këtë arsye, SHÇBA ka nisur hetim rreth reagimit të uniformave blu në parandalimin e konfliktit që pati një bilanc tragjik me 4 të vrarë.
Nga ana tjetër, nga hetimet e kryera deri më tani, rezulton se janë përdorur plot 6 armë, ndërsa policia ka gjetur vetëm dy pistoleta, një në vendin e ngjarjes, dhe një tjetër në hotelin “Gocaj”. Nga sa mësohet, nga pistoleta e dytë nuk është qëlluar.
30 minuta pas mesnatës së dielës, Kujtim Verracaku së bashku me vëllain e tij, Hasan Verracaku dhe 4 nipat, kanë shkuar tek hotel “Gocaj”, i cili ndodhet rreth 50 metra nga hoteli i tyre, nga ku kanë nisur edhe konfliktin me armë.
