Sot për popullin tonë është një ditë jo shumë e mirë, pasi përkujtohet masakra e Reçakut, në Kosovë, ku mbetën të vrarë 45 shqiptarë nga forcat serbe.
Lidhur me këtë ngjarje të rëndësishme dhe të dhimbshme për kombin tonë, ka reaguar ish-ministri i Jashtëm shqiptar, Ditmir Bushati, i cili shkruan se Beogradi nuk mban përgjegjësi edhe pse kanë kaluar 25 vite nga kjo masakër.
“Një çerek shekulli më parë, me 15 janar 1999, në Reçak 45 shqiptarë civil të pambrojtur u masakruan nga forcat serbe. Sot e kësaj dite, Serbia refuzon përgjegjësitë mbi këtë masakër dhe madje e mohon atë.
Mirëpo masakra e Reçakut tronditi mbarë botën demokratike, duke e bërë të pashmangshme ndërhyrjen ushtarake të NATO-s dhe ndalimin e agresionit të Serbisë në Kosovë.
Drejtësia e munguar peshon mbi familjarët e martirëve, plagët e së kaluarës, dhe nuk ndihmon në procesin e kërkimfaljes e pajtimit ndëretnik. Teksa nderojmë dhe kujtojmë ata që humbën jetën, le të mos harrojmë krimet që kanë ndodhur, në rast se nuk duam që historia të përsëritet”, shkruan Bushati.
