Gjashtë muaj pas ngjarjes tragjike në Memaliaj, ku tre persona humbën jetën dhe një mbeti i plagosur, hetimet mbeten në vend numëro. Dyshimet për bashkëpunim me elementë brenda qytetit dhe moszbatimi i masave të sigurisë po nxjerrin në pah probleme të thella në sistemin e sigurisë publike.
Bazuar në një hetim të thelluar të emisionit “Në Shënjestër”, ngjarja e 20 korrikut 2024 ishte kulminacioni i një sage hakmarrjesh mes familjeve Kalemi-Sadikaj dhe Papa, e cila nisi që nga viti 2021 në Greqi.
Atentatorët, të cilët dyshohet se kishin si objektiv anëtarë të familjes Kalemi, arritën të hynin në qytetin e vogël të Memaliajt pa u penguar, madje duke kaluar përpara komisariatit të policisë. Në një zhvillim të dyshimtë, kamerat e sigurisë së bashkisë nuk funksiononin atë ditë për shkak të një “ndërprerjeje të energjisë elektrike”.
Hamza Muka, babai i kamarierit Gledian Muka që humbi jetën në këtë ngjarje, ngre dyshime serioze për përfshirjen e elementëve të brendshëm. “Në një qytet të vogël si Memaliaj, të vish kaq kollaj, është e vështirë nga jashtë,” shprehet ai.
Ky problem i kamerave të sigurisë nuk është i izoluar vetëm në Memaliaj. Një situatë e ngjashme vihet re edhe në kryeqytet, ku pjesa më e madhe e kamerave të sigurisë, përfshirë ato pranë Drejtorisë së Policisë së Tiranës dhe në kryqëzime të rëndësishme, nuk funksionojnë. Pavarësisht rëndësisë së tyre për sigurinë publike, autoritetet nuk po ndërmarrin masa për riparimin e tyre.
Saga e përgjakshme mes dy familjeve përfshin një seri ngjarjesh, duke filluar nga vrasja e Aleksandër Sadikajt në Tiranë më 2022, e ndjekur nga ekzekutimi i Edmond Papës dhe një sërë atentatesh ndaj anëtarëve të familjes Kalemi në Shqipëri dhe Greqi.
Ndërsa hetimet vazhdojnë, mungesa e provave nga kamerat e sigurisë dhe pyetjet e shumta rreth lehtësisë me të cilën lëviznin autorët në qytet, po ngrenë shqetësime serioze për nivelin e sigurisë publike dhe efektivitetin e masave parandaluese në vend.
