Kryeministri i vendit Edi Rama, ka reaguar pas ngjarjes së rëndë që ndodhi ditën e sotme në qytetin e Elbasanit. Kryeministri i është përgjigjur akuzave që i kanë ardhur nga Presidenti i Republikës, Ilir Meta dhe opozita. Rama ka shkruar në “Twitter” se qytetarët nuk duhet të humbasin as qetësinë as durimin dhe as besimin dhe ka shtuar se 25 prilli do të sjellin bashkimin e shqiptarëve. Gjithashtu kryeministri Rama ka shkruar se “dëshpërimi i humbësve”, nuk duhet të ndikoj tek qytetarët duke sulmuar kështu në mënyrë direket opozitën.
“Dëshpërimi i humbësve nuk duhet e nuk do të na bëjë të humbasim as qetësinë, as durimin, as besimin se 25 prilli do të sjellë bashkimin e shqiptarëve për ta ngjitur Shqipërinë në majën e merituar dhe ndëshkimin kuptimplotë të forcave që duan të ribëhen gjarpër rreth këmbëve tona!”, shkruan Rama.
Kujtojmë se më herët gjatë ditës së sotme një ngjarje e rëndë ndodhi në qytetin e Elbasanit, ku për pasoj mbeti i vdekur në vend një person dhe u plagosën katër të tjerë, mes të cilëve edhe efektivë të forcave “Shqiponja”. Vrasja erdhi pas një konflikti që nisi nga dyshimet dhe akuzat e Partisë Demokratike se një fugon i Partisë Socialiste, po shpërndante para në këmbim të votave në qytetin e Elbasanit.
