Një sulm i përgjakshëm dhe i planifikuar me kujdes ka tronditur sërish Shtetet e Bashkuara. Në një nga skenat më të rënda të dhunës së armatosur të viteve të fundit, dy fëmijë të mitur, vetëm 8 dhe 10 vjeç, u vranë në vend, ndërsa 17 persona të tjerë u plagosën gjatë një sulmi të egër me armë brenda Shkollës Katolike “Ungjillëzimi” në Minneapolis. Dy nga fëmijët e plagosur ndodhen në gjendje kritike për jetën.
Autori, 23-vjeçari Robin Westman, i njohur për fiksimin e tij pas vrasësve serialë, hapi zjarr papritur përmes dritareve të kishës me një pushkë automatike, një armë gjahu dhe një pistoletë, duke lënë pas një skenë tronditëse, britma fëmijësh dhe trupat e vegjël të pajetë ende ulur në banka. Ai mbante gjithashtu një pajisje të improvizuar që gjeneronte tym, duke krijuar kaos dhe frikë të pakontrollueshme.
Pasi vrau fëmijët dhe plagosi 14 të tjerë bashkë me tre të rritur, Westman kreu vetëvrasje në parkingun e shkollës, duke e mbyllur me gjak këtë kapitull të errët që ka tmerruar vendin. Pamjet nga vendngjarja tregojnë për një dhunë të pamëshirshme, ndërsa policia konfirmon se të paktën dy dyer të shkollës ishin bllokuar nga jashtë me dërrasa druri, për të parandaluar arratisjen e viktimave të tij të pafajshme.
“Dy fëmijë të vegjël u vranë aty ku ishin ulur në banka, pa pasur asnjë mundësi të shpëtonin. Ky ishte një akt i ftohtë dhe brutal”, deklaroi me zë të dridhur shefi i policisë, Michael O’Hara. Sipas tij, të gjitha armët ishin blerë ligjërisht dhe autori nuk kishte precedentë penalë, çka e bën edhe më të frikshme lehtësinë me të cilën një vrasës arriti të krijojë një skenar të tillë terrori.
FBI ka shpallur ngjarjen si “akt terrorizmi” dhe “krim urrejtjeje kundër katolikëve”. Drejtori i agjencisë, Kash Patel, tha se i riu ka vepruar i vetëm dhe se janë hapur hetime të thelluara për motivet ideologjike dhe fetare që mund ta kenë shtyrë drejt këtij sulmi mizor.
Presidenti Donald Trump reagoi menjëherë pas masakrës, duke kontaktuar guvernatorin e Minesotës, Tim Walz, dhe urdhëruar uljen në gjysmështizë të flamujve në Shtëpinë e Bardhë. “Reagimi ka qenë i menjëhershëm dhe i koordinuar. Agjentët tanë janë në vendngjarje”, tha ai.
Një dëshmitar për SkyNews përshkroi tmerrin që përjetoi: “Dëgjova 30 deri në 50 të shtëna. Ishin të shpërndara dhe të fuqishme. Kam parë fëmijë që vraponin, ulërima dhe tym. M’u duk si luftë”.
Minneapolis është zgjuar në zi, ndërsa Amerika përballet sërish me plagën që nuk po mbyllet: dhunën me armë, që këtë herë shënjestroi fëmijët, në një vend që duhet të ishte më i sigurti prej të gjithëve, shkolla.
