Pas Vitit të Ri, Qeveria greke ka marrë vendimin për të rikthyer orën policore, duke filluar nga dita e nesërme e deri më 11 janar.
Zëdhënësi i qeverisë greke njofton se do të bëhet ndalimi për dyqanet, funksionimi i librarive, parukerive, shërbimeve të kujdesit dhe aktivitetet e gjuetisë apo peshkimit.
Ndalimi i udhëtimit rikthehet gjithashtu në orare më të rrepta, nga 21:00 në mbrëmje deri në 5:00 në mëngjes , me përjashtimin e vetëm të punonjësve të policisë dhe atyre që kanë nevojë për ndihmë mjekësore.
Kishat do të qëndrojnë të mbyllura për besimtarët. Siç përmendi zëdhënësi Petsas, masat merren me synimin e hapjes së shkollave më 11 janar.
Epidemiologët në Greqi paralajmërojnë se vendi është në prag të një shpërthimi të ri të rasteve me COVID-19, ndërsa infektimet janë shtuar ndjeshëm ditët e fundit. Autoritetet në vendin që deri më tani ka shkëlqyer në menaxhimin e pandemisë, po nxitojnë të frenojnë një valë të dytë të mundshme, duke e bërë maskën e detyrueshme në ambiente publike e duke ndaluar baret, kafenetë dhe lokalet e natës t’u shërbejnë klientëve që qëndrojnë në këmbë.
“Gjatë ditëve të fundit kemi vënë re moszbatim të masës së distancimit social dhe ka pasur raste të mbipopullimeve. Kjo ka çuar në rritje të rasteve me COVID-19”, deklaroi Nikos Hardialias, ministri i Mbrojtjes Civile.
