Ditën e sotme janë miratuar dy marrëveshje të rëndësishme me Kosovën në mbledhjen e qeverisë dhe pritet të firmosen në mbledhjen e përbashkët të dy qeverive të premten në Elbasan.
Ato janë lehtësimi i procedurave të lejeve të qëndrimit dhe për njohja e sigurimeve shoqërore për qytetarët e Kosovës dhe Shqipërisë.
Ministri i Brendshëm, Bledi Çuçi u shpreh se leja e qëndrimit do të përfshijë brenda edhe atë të punës dhe procedurat e marrjes së saj do të jenë të lehtësuara për qytetarët e dyja vendeve. Nga ana tjetër, Ministrja e Financave dhe e Ekonomisë, Delina Ibrahimaj sqaroi se njohja e kontributeve për vitet e punës do të jetë edhe për të gjitha vitet e punës, edhe ato para hyrjes në fuqi të marrëveshjes.
“Sot miratuam një nga marrëveshjet që do nënshkruajmë ditën e premte, në mbledhjen midis qeverisë të Kosovës dhe Shqipërisë, që ka të bëjë me lejet e qëndrimit të shtetasve respektivë, është një lajm i mirë për shtetasit e Kosovës, që do të marrin thjesht me një aplikim dhe pa dokumente menjëherë lejen e qëndrimit për 5 vite në Shqipëri, brenda do të jetë edhe leja e punës. Është lajm i mirë edhe për shqiptarët që jetojnë në Kosovë që do të marrin leje qëndrimi në Kosovë për të qëndruar atje me procedura më të lehtësuar që janë sot. Është në vazhdën e disa marrëveshjeve që do të nënshkruajmë brenda sektorëve që përfshin Ministria e Brendshme”, u shpreh Çuçi.
