Ky sesion i ri parlamentar për këtë vit, i fundit në fakt për këtë mandat, ka nisur me debate mes opozitës parlamentare dhe kryeparlamentarit e mazhorancës.
Në fokus të debateve mes të tjerash, kanë qenë edhe marrëveshjet e shtetit shqiptar me kompanitë që kanë prodhuar vaksinat kundër koronavirusit, mes të cilave është edhe Pfizer, e cila ka sjellë tashmë një pjesë të dozave të vaksinave në Shqipëri.
Për deputetin Ralf Gjoni kalimi dhe votimi në Parlament i marrëveshjes së shtetit shqiptar me kompaninë e vaksinave anti-covid me kusht që deputetët mos të nxjerrin sekretin, është një tallje e qeverisë, pasi nuk ka bërë transparente marrëveshjet, që i kushtojnë miliona lekë buxhetit.
Mirëpo në sqarimin e tij, kryeparlamentari Ruçi u shpreh se marrëveshja është bërë publike në Konferencën e Kryetarëve dhe është kërkuar që t’iu jepet edhe deputetëve.
Diskutimet:
Ralf Gjoni: Ky ekzekutiv nuk mund të tallet në këtë far feje me Parlamentin. Po kërkoj në rendin e ditës tekstin e akteve normative, asnjë shenjë. Deputetët e Kuvendit nuk mundet të shprehen me votim, bazuar thjesht në tituj të lexuar nga kryetari i Kuvendit.
Keni kaluar nga debati i madh i vitit të kaluar me ministren Manastirliu për vaksinën Covax, e cila nuk e di se ku po fshihet, se nuk po shohim asnjë gjurmë të saj, në disa vaksina klandestine, deri në marrëveshjen teksti i së cilave mungon.
A ka mundësi të ketë transparencë, sepse kemi përgjegjësi të madhe si deputetë për të votuar shuma të mëdha në buxhet për vaksinat, por procedurat duhet të bëhen transparente. Ndryshe po e kthejmë shtetin në një çerdhe.
Ruci: Të lutem, avash, një minutë. Unë bëra një propozim. S’kemi të bëjmë me tallje të ekzekutivit dhe s’ka vend për ta thënë këtë. Më dëgjo, se unë të dëgjova.
Të dy aktet unë i kam bërë publike në Konferencën e Kryetarëve, ku kam artikuluar fjalinë “nuk do të botohen”, por deputetët duhet të njihen absolutisht me to. Kështu që s’ka asgjë këtu për transparencë. Kjo është një kërkesë për të gjitha parlamentet dhe ne jemi të detyruar ta zbatojmë.
Ruçi: Është një marrëveshje sekrete që nuk do të bëhet publike as për mediat as për një. Është një kërkesë e tyre, që mos ta kenë marrëveshjen deputetët, është një kërkesë për të gjitha parlamentet jo vetëm për tonin.
Gjuzi: Kryeministri ka shkelur ligjin, sepse në mënyrë kontabandë ka futur dhe ka bërë një vaksinë të pacertifikuar nga laboratori i barnave. Ndaj sot në nisje të këtij sesioni Rama mungon këtu se e dinte që opozita do i nxirrte probleme, parafolësit e thanë.
Ruçi: Këtë po e thua ti.
Gjuzi: Të lutem z.kryetar…
Ruçi: Jo jo ke gjë për të thënë për rendin e ditës?
Gjuzi: Po mbivendoseni kryetar. Do të na mbyllësh gojën. Rama na e mbyll gojën. Sepse doni t’i mbani të gjitha në kontroll. Pse nuk vjen kryeministri në interpelancë me deputetët. Është i paqefshëm?
Ruçi: Do të vijë në seancën tjetër./Gazetareforma.com/
