Zyra e kryeministrit izraelit, Benjamin Netanyahu, ka konfirmuar arritjen e marrëveshjes për lirimin e pengjeve.
Pas vonesës në votimin për miratimin e armëpushimit të Gazës, marrëveshja u finalizua mëngjesin e së premtes, duke marrë mbështetjen e ekipit negociator. Kabineti i sigurisë pritet të mblidhet për ratifikimin e marrëveshjes, ndërsa familjet e pengjeve janë informuar për zhvillimet.
Marrëveshja, e ndërmjetësuar nga SHBA dhe Katari, parashikon lirimin e 33 pengjeve, përfshirë gra, fëmijë dhe të moshuar, në këmbim të të burgosurve palestinezë.
Faza e parë e planit gjashtëjavor përfshin gjithashtu tërheqjen e trupave izraelite nga zonat e populluara të Gazës, kthimin e palestinezëve të zhvendosur dhe lehtësimin e qasjes për ndihmat humanitare.
Negociatat për fazat e mëvonshme do të synojnë lirimin e pengjeve të mbetura, tërheqjen e plotë të trupave izraelite dhe rindërtimin e Gazës, proces që mund të zgjasë për vite.
Konflikti, i cili filloi më 7 tetor 2023, pas një sulmi të Hamasit që shkaktoi 1,200 viktima dhe 251 pengje në Izrael, ka shkaktuar mbi 46,000 të vdekur në Gaza, sipas burimeve lokale.
Situata në rajon mbetet kritike, me shkatërrime masive dhe një krizë humanitare në përkeqësim.
