Kryeministri Albin Kurti ka reaguar për herë të parë pas lajmit se ishte firmosur marrëveshja mes Serbisë dhe Kosovës për sa i përket reciprocitetit të targave.
Me anë të një postimi në rrjetet sociale Kurti ka thënë se ashtu si mbulohen simbolet e Kosovës kur hynë në Serbi, ashtu do të mbulohen edhe ato të Serbisë kur të hyjnë në territorin e Kosovës. Gjithashtu ai ka lajmëruar se do të largohen nga pika kufitare e Bërnjakut dhe Jarinjës të gjitha forcat speciale që kanë qëndruar aty dhe ka shtuar se do të qëndrojnë në gatishmëri për të ndërhyrë në çdo rast.
Postimi i Plotë nga Kryeministri i Kosovës, Albin Kurti
Reciprociteti i targave të automjeteve është vendosur. Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë.
Njësia Speciale e Policisë së Kosovës ka shkuar në Jarinje dhe Bërnjak më 20 shtator për të mbrojtur vendkalimet dhe policinë kufitare nga bllokuesit e rrugëve dhe qarkullimit të lirë. Meqë ata do të largohen, njësia jonë speciale nuk ka pse qëndron atje, dhe mbetet gjithnjë e gatshme për ndërhyrje në çfarëdo cenimi të njëjtë apo të ngjashëm në të ardhmen. Natyrisht, policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt.
Në javën e shkuar, Presidenti i Serbisë vuri katër kushte për takimin në Bruksel të përfaqësuesve tanë. Natyrisht që nuk ju plotësuan ato dhe dje u zhvilluan bisedimet në Bruksel. Tash fillon epoka kur Serbia nis e mësohet me reciprocitet.
