Marrëveshja Kosovë-Serbi për targat, Basha: Një hap i rëndësishëm

Kreu i Partisë Demokratike, Lulzim Basha ka përshëndetur marrëveshjen e arritur mes Kosovës dhe Serbisë sa i përket reciprocitetit të targave. Në një postim në Twitter, Basha shkruan se marrëveshja është një hap i rëndësishëm në uljen e tensioneve dhe në trajtimin e barabartë të qytetarëve në të dyja anët e kufirit.
Basha deklaron se ai dhe PD mbështesin përpjekjet e BE dhe SHBA për një zgjidhje të përhershme dhe njohje reciproke.
“Përshëndes marrëveshjen e arritur sot mes Kosovës dhe Serbisë me ndërmjetësimin e të dërguarit special të BE, Miroslav Lajčák. Ky është një hap i rëndësishëm në uljen e tensioneve dhe në trajtimin e barabartë të qytetarëve në të dy anët e kufirit.
Unë dhe PD mbështesim dhe inkurajojmë përpjekjet dhe angazhim e BE dhe SHBA për një zgjidhje të përhershme, për marrëveshjen e njohjes reciproke mes Kosovës dhe Serbisë”, shkruan Basha.
Kosova dhe Serbia arritën një marrëveshje me tri pika në Bruksel për reciprocitetin e targave dhe ç’tensionimin e situatës në kufi.
Njësitë speciale dhe barrikadat do të fillojnë të largohen nga pikat kufitare të Jarinjës dhe Bërnjakut. Nga 4 tetori do të nisë zbatimi i vendimit për letra ngjitëse në vend të targave, si një zgjidhje e përkohshme.Në 21 tetor palët do të takohen sërish për të vendosur për një zgjidhje të përhershme.