Kryeministri i Kosovës Avdullah Hoti, ka deklaruar se në takimin e së hënës në Bruksel do të tentohet për një marrëveshje përfundimtare me Serbinë.
Hoti ka theksuar se në takim do të përflitet njohja reciproke dhe normalizimi i marrëdhënieve midis dy vendeve.
Me anë të një postimi në rrjetin social Facebook, Hoti ka shkruar se marrëveshja e plotë do të përmbyllet me njohje reciproke.
“Bazuar në zotimet që i kemi dhënë në Samitin e Parisit më 10 korrik 2020, si dhe mbështetjen që kemi marrë nga Presidenti Makron dhe Kancelarja Merkel, të hënën në Bruksel e takojmë palën serbe për të dialoguar për marrëveshjen përfundimtare për njohje reciproke dhe normalizim të marrëdhënieve në mes të Kosovës dhe Serbisë”, ka shkruar Hoti në postimin e tij.
Kujtojmë se Kosova dhe Serbia kanë nënshkruar ditën e premte një marrëveshje në Uashington.
Marrëveshja u arrit pas bisedimeve në Shtëpinë e Bardhë, për herë të parë në nivelin më të lartë të udhëhequr nga Shtetet e Bashkuara të Amerikës (SHBA).
Postimi i plotë:
“Bazuar në zotimet që i kemi dhënë në Samitin e Parisit më 10 korrik 2020, si dhe mbështetjen që kemi marrë nga Presidenti Makron dhe Kancelarja Merkel, të hënën në Bruksel e takojmë palën serbe për të dialoguar për marrëveshjen përfundimtare për njohje reciproke dhe normalizim të marrëdhënieve në mes të Kosovës dhe Serbisë.
Marrëveshja arrihet vetëm atëherë kur përmbyllet me njohje reciproke. Nuk do të ketë marrëveshje të ndërmjetme, parciale apo kreative që nuk e zgjidh problemin përgjithmonë.
Do të ketë vetëm marrëveshje përfundimtare për njohje reciproke, që është sistematike dhe ku përfshihen të gjitha çështjet që duhet të adresohen në mes të dy vendeve të pavarura duke u bazuar në konventat, standardet dhe praktikën ndërkombëtare të rregullimit të marrëdhënieve në mes të dy vendeve të pavarura.
Kosova mbetet e përkushtuar për paqe, stabilitet, zhvillim dhe integrim euro-atlantik të të gjithë regjionit”, ka shkruar kryeministri Kosovar Avdullah Hoti.
