Pikat kufitare Jarinje dhe Bërnjakë, të cilat lidhin Kosovën me Serbinë, kanë filluar që nga dita e shtunë që të lirohen për qarkullim pas lirimit të barrikadave të vendosura nga serbët lokalë dhe largimit të Njësisë Speciale të Policisë së Kosovës.
Kujtojmë se gjatë orëve të para të mëngjesit të së shtunës, datë 2 tetor nisi zbatimi i pikës së parë së marrëveshjes, ku në afërsi të këtyre pikave kufitare janë vënë re pjestarë të misionit të NATO-s në Kosovë dhe KFOR-it. Sipas marrëveshjes së arritur në Bruksel, barrikadat dhe Njësitë Speciale të Policisë së Kosovës do të tërhiqen paralelisht.
Këto dy pika kufitare ishin bllokuar nga serbët lokalë që prej 20 shtatorit, kur Qeveria e Kosovës mori vendimin që të zbatojë masën e reciprocitetit në target e makinave të regjistruara në Serbi.
Pas më shumë se 13 ditë bllokade këto dy pika kufitare u liruan, pas marrëveshjes së arritur në Bruksel në mes palës kosovare dhe asaj serbe.
Ndërsa pika e dytë, do të nisë së zbatuari nga sot (4 tetor 2021), ku do të fillojë zbatimi i përkohshëm i sistemit të afisheve, me të cilat si Kosova, ashtu edhe Serbia do të mbulojnë elementet shtetërore të targave të njëra-tjetrës.
Pika e tretë parasheh që më 21 tetor do të nisë punën një ekip i përbërë nga zyrtarë të BE-së, Kosovës dhe Serbisë për të gjetur një zgjidhje të përhershme.
Brenda gjashtë muajve, prej nisjes së takimit të parë, ky grup pune, do të prezantojë gjetjet për një zgjidhje të përhershme në formatin e dialogut të nivelit të lartë.
