Sekretari i Përgjithshëm i NATO-s, Mark Rutte, gjatë një deklarate për mediat ndërkombëtare nga Tirana, komentoi mbi negociatat mes Rusisë dhe Ukrainës që po zhvillohen në Turqi, me ndërmjetësimin e sekretarit amerikan të shtetit, Rubio.
Rutte kritikoi ashpër qasjen e Kremlinit, duke e cilësuar një gabim serioz vendimin e Vladimir Putin për të dërguar në bisedime një delegacion të nivelit të ulët, gjë që, sipas tij, tregon mungesë vullneti dhe serioziteti për arritjen e një marrëveshjeje.
“Putin ka bërë një gabim të madh duke mos e marrë me seriozitet këtë proces. Ai e di shumë mirë si negociohet dhe se topi është në fushën e tij. Çuarja e një delegacioni të dobët në Turqi tregon pikërisht të kundërtën e asaj që i nevojitet situatës,” u shpreh Rutte.
Delegacioni rus, që drejtohet nga një prej këshilltarëve të afërt të presidentit Putin, është parë si tregues i mungesës së angazhimit real nga ana e Moskës.
