Mark Molla, ish-administrator i Ujësjellës-Kanalizimeve Shkodër, ka dëshmuar sot në Gjykatën e Posaçme, në procesin ndaj ish-kryebashkiakut Bardh Spahia, të cilin e ka kallëzuar në SPAK për shkarkim të paligjshëm dhe moszbatim të vendimeve gjyqësore.
Sipas Mollës, largimi i tij nga detyra ishte arbitrar dhe u krye jashtë çdo procedure ligjore.
Ai deklaroi se ishte emëruar me mandat 3-vjeçar dhe se puna e tij ishte vlerësuar nga ministrat e linjës. Sipas tij, pas ardhjes në detyrë të Spahisë, ai nuk u lejua më të ushtronte funksionin si administrator.
“Nuk jam lejuar as të hyj në institucion. Nuk jam njoftuar për asnjë mbledhje të Asamblesë që ka vendosur largimin tim. Kam respektuar ligjin dhe vendimet e gjykatës, por janë shkelur jo një, por tre vendime gjyqësore,” tha Molla.
Ai përshkroi mënyrën se si ishte informuar për shkarkimin, në dy raste me postë dhe në të tretin nga drejtuesja e Asamblesë si dhe tentativën për ta larguar fizikisht nga zyra.
“Një ditë, ndërsa isha në Postribë për punë, godina u rrethua nga policia. Më kërkuan të liroja zyrën, por unë refuzova pa një vendim gjykate. Më pas, zyra u thye në mënyrë të paligjshme nga një komision që është formuar një ditë pasi kishte kryer thyerjen.”
Ai akuzoi gjithashtu për mungesë transparence në të gjithë procesin, duke theksuar se nuk ishte ftuar asnjëherë në mbledhjet që diskutonin largimin e tij dhe se një urdhër i Spahisë kufizonte hyrjen në institucion vetëm për një pjesë të vogël të stafit.
