Sot zyrtarisht Lulzim Basha njoftoi nëpërmjet zyrës së tij të shtypit se Mark Marku, pedagogu i Universitetit të Tiranës, ish-deputet i PD në vitin 2009 deri në vitin 2013, do të jetë drejtues i qarkut të Lezhës.
I pyetur për këtë vendim të Bashës, Marku tha se për të nuk ishte surprizë sepse strukturat e Lezhës e kishin kërkuar atje. “Vendimi është marrë shumë kohë. Më kanë thënë që strukturat kërkonin që të shkoja. Unë e kam pasur shumë të vështirë të rikthehesha në listën e kandidatëve për deputet”, tha Marku për mediat.
“Njerëzit thonë është privilegj të jesh deputet. Po është privilegj të përfaqësosh njerëzit. T’ju zgjidhësh hallet dhe problemet njerëzve. Kam marrë një vendim të vështirë, por duke pas parasysh se duhet bërë, duhet që dikush të marrë përgjegjësi. Unë uroj që të gjithë ata që mendojnë si unë, që janë të shumë, të lëvizin. Duhet një lëvizje.
Unë po them që çfarëdo pozite pushteti, e kam treguar dhe kur kam qenë deputet, që nuk kam bërë kompromise për shkak të pushtetit. Njerëzit do ndeshen me aktet e mia. Se aktet flasin tani, jo fjalët”, shtoi ai.
Marku ka qenë anëtar i Komisionit të Verifikimit të kandidatëve për deputetë të PD. Për këtë ai është pyetur dhe ka thënë se vendimin e kishte marrë Basha, sepse vetë nuk kishte dashur që të përfshihej.
“Unë nuk e kam zgjedhur veten. E kam refuzuar. Kam thënë që nuk do përfshihem. Kam thënë nuk do jem, do jap këtë kontribut, kaq. Ishte një gjë e re, u ftova dhe shkova. Unë nuk jam futur nga listat që të jem i qartë (flet për Komisionin e PD-së).
Kryetari i opozitës më ka thënë që futesh nga votat e 20%-shit, akademikët, shoqëria civile. Jo nga listat. Në këtë kuptim duhet vlerësuar si akt. Për mua të gjithë ata që janë propozuar dhe ishin në lista, e meritojnë të ishin kandidat po aq sa unë”, përmbylli Mark Marku, drejtues politik i Lezhës.
Mark Marku ishte pjesë e grupit që kryen procesin vettingut në PD duke skualifikuar nga 3000 mijë kandidatë duke i çuar në 900.
Kështu, Mark Marku skualifikoi dhe hoqi me qindra emra duke qenë në konflikt interesi, sepse do të kandidonte vetë.
Pas Mark Markut mund të kandidojë dhe Bujar Nishani i cili ka shprehur ambiciet e tij. Pra, mund të bëhen dy personazhe që kanë bërë vettingun e të tjerëve dhe vetëkandidojnë.
/Gazetareforma.com/
