Pogradeci do të kthehet në epiqendrën e sportit më 26 korrik 2025, kur qyteti do të presë Maratonën Kombëtare dhe Ndërkombëtare, një nga aktivitetet më të rëndësishme të verës.
Eventi, i organizuar nga shoqata “Maraton Albania” në bashkëpunim me Bashkinë e Pogradecit, do të nisë në orën 19:00 dhe pritet të mbledhë dhjetëra sportistë nga vendi dhe jashtë tij.
Maratona përfshin dy kategori garimi. Gjysmë-maratona me një itinerar prej 21 kilometrash nis nga fshati Lin dhe kalon përgjatë bregut të liqenit deri në zemër të qytetit.
Ndërkohë, mini-maratona prej 10 kilometrash fillon nga qendra e Pogradecit dhe shtrihet në segmentin Pogradec–Buçimas–Tushemisht, duke përfunduar në pikën e nisjes.
Për të garantuar sigurinë dhe mbarëvajtjen e aktivitetit, Policia e Shtetit ka ndërmarrë masa të shtuara. Gjatë orarit të garës do të ketë bllokime të përkohshme në disa akse rrugore.
Në segmentin Lin–Pogradec do të kufizohet lëvizja në krahun e majtë të rrugës, ndërsa në aksin Tushemisht–Pogradec do të ndalohet qarkullimi në të dy drejtimet. Po ashtu, disa rrugë brenda qytetit do të jenë të mbyllura deri në përfundim të maratonës.
Ndërprerjet do të jenë të vlefshme nga ora 19:00 deri në orën 21:00. Policia e Korçës i bën thirrje qytetarëve për mirëkuptim dhe bashkëpunim, duke theksuar se çdo masë është në funksion të zhvillimit të sigurt dhe të suksesshëm të këtij eventi sportiv.
