Presidenti i Republikës së Maqedonisë së Veriut, Stevo Pendarovski, ka njoftuar ditën e sotme se ka marrë një vendim të ri përsa i përket gjendjes së re të jashtëzakonshme në territorin e vendit të tyre.
Ai është shprehur se nisur që nga dita e sotme, gjendja e jashtëzakonshme do të zgjatë 8 ditë, pra deri në 22 qershor.
Vendimi u mor duke pasur parasysh shifrat e larta të raportuara çdo ditë në vend.
103 raste të reja me koronavirus në 24 orë dhe 5 viktima u raportuan vetëm të hënën.
Në total, që prej shpërthimit të pandemisë, në Maqedoninë e Veriut janë prekur më shumë se 4100 persona dhe kanë humbur jetën 193 vetë.
Gjithashtu për shkak të situatës, autoritetet kanë vendosur të shtyjnë për më 15 korrik datën e zgjedhjeve të përgjithshme.
Lajmin e konfirmoi dhe lideri i LSDM-së, Zoran Zaev i cili deklaroi se kushtet e VMRO-DPMNE-së janë pranuar dhe se lëvizje nga kjo datë nuk ka.
“Sonte kam marrë një vendim të ri për të përcaktuar ekzistencën e një gjendje të jashtëzakonshme në territorin e të gjithë vendit. Vendimi është marrë në bazë të nenit 125 dhe nenit 126 të Kushtetutës së Republikës së Maqedonisë së Veriut, pas propozimit të paraqitur nga Qeveria e Republikës së Maqedonisë së Veriut dhe zgjat tetë ditë, duke filluar nga 15 qershori i vitit 2020”, shkroi presidenti Pendarovski në profilin e tij zyrtar në rrjetet sociale.
