Sot hyjnë në fuqi masat e reja lehtësuese të vendosura në kuadër të pandemisë së koronavirusit, ministrja e Shëndetësisë, Ogerta Manastirliu thekson se mbetet ende i lartë rreziku nga varianti i ri, “Delta”. Sipas ministres Manastirliut, ky variant i ri koronavirusit është identifikuar pranë vendit tonë, siç ishin rastet e para në Kosovë.
“Nga sot në fuqi plani i lehtësimit të mëtejshëm të masave Anti Covid, për t’i dhënë më shumë frymëmarrje jetës social-kulturore dhe turizmit në vend. Por mbetet ende alerti nga varianti Delta, i cili është identifikuar edhe në vendet pranë nesh, ndaj nuk duhet të ulim vigjilencën dhe duhet të ecim me shpejtësi me vaksinimin anticovid, për mbrojtjen e jetës dhe shëndetit të qytetarëve. Shqipëria buzëqesh”, shkruan Manastirliu.
Bashkimit Evropian i duhet një qasje më e unifikuar për rregullat e udhëtimit në mënyrë që të parandalohet përhapja e versionit Delta. Në shumë vende të botës janë ngritur shqetësime të mëdha për një valë të re të infektimeve, për shkak të përhapjes me shpejtësi të variantit Delta të koronavirusit, i cili besohet që është më i transmetueshëm se variantet e tjera. Por, Organizata Botërore e Shëndetësisë (OBSH) ka thënë se në përgjithësi, vaksinat edhe ndaj këtij varianti mbeten shumë efektive.
