Vaksinimi masiv për të parandaluar përhapjen e koronavirusit, vijon në të gjithë vendin me ritme të larta. Kryeministri i Shqipërisë, Edi Rama, i shoqëruar nga ministrja e Shëndetësisë, Ogerta Manastirliu, ka ndjekur nga afër procesin e vaksinimit në Pogradec. Ndërkohë, Manastirliu theksoi se në të gjithë qarkun Korçë, kanë marrë doza anti-Covid më shumë se 9 mijë qytetarë.
“Kemi arritur numër të lartë vaksinimit. Në qarkun e Korçës janë vaksinuar mbi 9 mijë qytetarë. Kemi vaksinuar mbi 500 të moshuar, në ditë, procesi po ecën shumë mirë.
Sot arrijmë 200 mijë vaksinime, 192 mijë ishim dje. Do të ecim me ritëm. Përmbyllim efektivët e policisë, duke ulur fashën +65, dhe deri në 60 me të sëmurët kronikë. Ky ritëm do të vijojë të jetë me intensitet të lartë”, u shpreh Manastirliu.
Vaksinimi masiv në vend ka nisur disa ditë më parë dhe ritmet po ecin me një mesatare prej rreth 12 mijë të vaksinuarish në ditë. Edi Rama, kryeministri i Shqipërisë, ka theksuar se procesi i vaksinimit masiv, pritet të përfundojë brenda 14 muajve të ardhshëm.
Fillimisht, iu është dhënë prioritet moshave mbi 65-vjeç, për të zbritur më pas në moshat mbi 60-vjeç e për të vijuar me efektivët e policisë dhe gazetarët. Ky proces vaksinimi masiv, është kryefjala e fushatës së PS-së për zgjedhjet e 25 prillit.
