Ditën e sotme ka nisur faza e dytë e vaksinimit në stadiumin “Air Albania”. Personel mjekësor kanë marrë dozën e dytë të vaksinës Pfizer që mbërriti ditën e djeshme në aeroportin e Rinasit. Është vaksinuar me dozën e dytë edhe kryeministri Rama dhe ministrja e Shëndetësisë Ogerta Manastirliu. Kjo e fundit ka komentuar edhe infektimin e mjekut Pëllumb Pipero, duke thënë se ky i fundit është në gjendje të mirë shëndetësore.
“Do të jetë një proces i kombinuar, do të vijojë procesi për ata që do e marrin për herë të parë. Ne kemi vijuar për të mundësuar trajnimin e personelit. Ne kemi në sistemin shëndetësor personel që duan të jenë të përfshirë. Jemi të gatshëm të përfshijmë dhe infermierë të tjerë. Pipero është mirë me shëndet është duke kaluar ditët e sëmundjes covid dhe do të kemi shumë shpejt lajme nga mjekët që e ndjekin. Nga ana tjetër për sa i përket dozës së dytë do të tregojnë mjekët se si do të procedohet.”. tha Manastirliu.
Mjeku Pëllumb Pipero u infektua dy javë pasi kishte marrë dozën e parë të vaksinës anti-COVID. Numri i rasteve me koronavirus ka ardhur duke u rritur në vendin tonë, teksa qeveria ka lënë në fuqi masat e vendosura.
