Ministrja e Shëndetësisë Ogerta Manastirliu ka bërë të ditur se ditën e hënë do të vijnë në Shqipëri 7020 doza Pfizer. Teksa ishte e pranishme në Vlorë, ajo u shpreh para gazetarëve se do të vijnë dhe pjesa tjetër e vaksinave kineze nga kontrata me distributorin turk.
Ndërkohë që ditën e hënë do të ulet fasha e vaksinimit në + 60 vjeç. “Në Vlorë janë më shumë se 26 mijë vaksinime të kryera. Vazhdon ritmi i vaksinimit në qendra shëndetësore. Ditën e hënë ulim fashën +60. Kemi filluar tashmë me pjesën e kolaudimit.
Nga nesër fillojmë shpërndarjen e vaksinave Sinovac. Të hënën presim 7020 doza pfizer dhe pjesën tjetër nga kontrata me distributorin e Sinovac”, deklaroi ministrja.
Deri tani në Shqipëri janë përdorur 4 lloje të vaksinave anti-Covid:Pfizer, AstraZeneca, Sputnik V dhe vaksina kineze e Sinovac. Më herët Rama dhe Manastirliu kanë lajmëruar se në vend do të vijnë doza të tjera të Pfizer dhe AstraZeneca, ndërsa janë siguruar 1 milionë doza të Sinovac, prej të cilave kanë mbërritur 192 mijë me të cilat ka vazhduar vaksinimi për të moshuarit, gazetarët e terrenit dhe punonjësit e policisë.
Brenda 10 ditëve të ardhshme do të vijnë në Shqipëri 50 mijë doza të tjera të vaksinës ruse Sputnik V. Lajmin e ka bërë të ditur kryeministri Edi Rama me anë të një postimi faqen e tij në Facebook. Rama shkroi se është arritur marrëveshja që vaksinat të vijnë në vend Brenda 10 ditëve, ndërsa thotë se se shpejt do ta lëmë pas tunelin e pandemisë.
