Ministrja e Shëndetësisë, Ogerta Manstirliu ka bërë të ditur me anë të një fotoje se vaksinimi po vazhdon derë më derë, ndërsa këtë herë është ndalur në Bicaj të Kukësit.
Ndër të tjera, ministrja risjell në kujtesë se që prej ditës së hënë nis java e hapur e vaksinimit për çdo qytetar që është mbi 18 vjeç. Vaksinimi mund të kryhet në çdo qendër shëndetësore dhe çdo qendër vaksinimi kudo në vend deri në datën 26 korrik.
Postimi i plotë i Manastirliut:
“Në Bicaj të Kukësit, ku ekipet tona shëndetësore po vaksinojnë derë më derë, për të mbrojtur sa më shumë qytetarë nga virusi i rrezikshëm COVID-19.
Nga nesër, nis java e vaksinimit të hapur për çdo qytetar +18 vjeç, për t’u vaksinuar pa kufizim, në çdo qendër shëndetësore dhe qendër vaksinimi kudo në vend”
Më herët Manastirliu ka bërë me dije se po ashtu të hënën pritet të vijnë 32 mijë dozët e radhës të vaksinës Pfizer. Deri tani në vendin tonë kanë ardhur më shumë se 1 milionë e 500 mijë doza vaksine dhe janë kryer më shumë se një milionë vaksinime. Procesi ka filluar që në muajin janar dhe në vendin tonë janë përdorur vaksina të Pfizer, AstraZeneca, Sinovac dhe vaksina ruse Sputnik V.
