Shtimi i rasteve të reja në vend ka bërë që Komiteti Teknik i Ekspertëve të zhvillonte një mbledhje ditën e sotme duke bërë një rezyme të masave kufizuese të cilat do të qëndrojnë ende në fuqi por dhe për vendosjen e masave të tjera.
Ministrja e Shëndetësisë, Ogerta Manastirliu nga mbledhja e Komitetit Teknik të Ekspertëve e fokusoi fjalën e saj te fushata e vaksinimit, ndërsa theksoi se ata që nuk vaksinohen po rrezikohen seriozisht. Ajo pohoi se varianti Delta po përhapet me shpejtësi të frikshme në mbarë botën.
“Para e të flas për situatën aktuale në vend, po përmbledh disa fjalë; në 18 muaj COVID na e ka bërë të qartë se nuk njeh kufijtë. Përballë forcës goditëse, masat janë të ndërlidhura. Shifrat nga Kosova, Maqedonia dhe vendet e rajonit janë të dhimbshëm, nga më të lartat, qysh prej fillimit të pandemisë. Varianti Delta po vërteton tezën e studiuesve se ky është një variant me infektueshmëri më të lartë. Në Angli shifrat janë 26 herë më të larta se këtë periudhë një vit më parë. Delta po përhapet me shpejtësi të frikshme. Po prek njerëz që nuk e kanë bërë vaksinën. Dhe pandemia ia ka lënë në dorë termit; ‘pandemia e të pavaksinuarve’. Në COVID 1 janë pothuaj 100 të shtruar, 17 në terapi intensive. Janë shumë më pak se në rajon, falë shpejtësisë që Shqipëria nisi vaksinimin. Janë shumë, po të kemi parasysh se jemi në gusht. Kush nuk është vaksinuar ende po rrezikon seriozisht.”, tha ajo.
Duke bërë apel për vaksinimin anticovid, Manastirliu tha:
“Vaksina shmang format e rënda të sëmundjes dhe fatalitetet. Vaksina bën dallimin a madh, mes jetës dhe vdekjes. Zgjedhja për të bërë apo jo vaksinën nuk është thjesht personale. Nuk është rasti klasik “ç’punë ke ti ç’bëj unë me trupin tim”. Jo! Refuzimi i armës mbrojtëse, që sot çdo qytetar e ka në dispozicion, falas, në çdo qendër shëndetësore në çdo cep të Shqipërisë, vë në rrezik jo vetëm jetën e kujt refuzon.
Ai vë në rrezik jetën e familjarëve. Vë në rrezik jetën e miqve. Vë në rrezik jetën e shoqeve dhe shokëve në klasë apo auditor, të kolegëve e kolegeve në vendin e punës”.
Ministrja Manastirliu tha se nisur nga kjo situatë, do të zbatohet plani i detyrimit të vaksinimit për disa kategori.
“Shtatori do të jetë muaji i dytë i hapur për vaksinimin. Do të nisim shumë shpejt zbatimin e planit për kalimin në një tjetër fazë të fushatës së vaksinimit, ku detyrimi i disa kategorive për t’u vaksinuar do të bëhet në emër të së drejtës së të tjerëve për të mos u infektuar. Të gjitha vendet po lëvizin në këtë drejtim dhe ne do ta bëjmë pa humbur kohë në ditët në vijim”, nënvizoi Manastirliu.
Ministrja Manastirliu ka përsëritur apelin për vaksinim ndaj COVID19, duke e konisderuar si armë mbrojtëse për çdo qytetar për të shmangur format e rënda të sëmundjes dhe fatalitetet.
