Ministrja e Shëndetësisë, Ogerta Manastirliu ka kërkuar njohjen e certifikatave të vaksinimit gjatë fjalës së saj në Samitin e Ministrave të Ballkanit Perendimor. Ajo tha se vendet e Ballkanit Perëndimor kanë një nivel të ulët të përhapjes së infeksionit dhe gjithashtu certifikatat duhen njohur për rëndësinë strategjike që ka turizmi në ekonominë e këtyre vendeve.
“Njohja e përbashkët e certifikatës elektronike të vaksinimit ndërmjet vendeve të Ballkanit Perendimor dhe vendeve të Bashkimit Europian është e domosdoshme: E para, sepse vendet e Ballkanit Perendimor kanë një nivel të ulët të përhapjes së infeksionit; e dyta, për shkak të lidhjeve të ndërsjellta dhe shkëmbimit që ekziston mes vendeve të Ballkanit Perendimor dhe vendeve të Bashkimit Europian dhe e treta, për rëndësinë strategjike që ka turizmi për ekonomitë e vendeve tona. Ndaj unë do të doja të përfitoj nga ky rast, për të sjellë në vëmendjen e kolegëve të nderuar në këtë takim, që certifikata jonë, të njihet nga të gjitha vendet anëtare të Bashkimit Europian, për të ndihmuar qytetarët tanë të udhëtojnë të sigurt dhe të lirë”, tha Manastirliu.
Komisioneri për Fqinjësi dhe Zgjerim, Oliver Varhelyi tha se tre vende të Ballkanit Perëndimor janë ciëlsuar tashmë si zonë e gjelbër dhe BE do që kjo verë të jetë shumë më e mirë se e vitit të kaluar.
“Siç e dini tashmë tre vende të Ballkanit Perendimor janë vlerësuar ‘zonë e gjelbër’ për lëvizjen e lirë dhe ne duam që kjo verë të jetë shumë më e mirë se e vitit të kaluar, sa i takon lëvizjes së lirë dhe besojmë se e tillë do të jetë. Ne e kemi treguar se jemi krah vendeve të Ballkanit Perendimor me mbështetjen e dhënë edhe sa i takon sigurimit të vaksinave anticovid dhe do t’a thellojmë këtë mbështetje në muajt në vijim. Nga ana tjetër ne po punojmë për një sistem, për të njohur certifikatat e vaksinimit edhe nga vendet e treta”, tha Varhelyi.
Ministri gjerman i Shëndetësisë, Jens Spahn, i cili drejtonte samitin tha se duhet pasur kujdes me variantin Delta pasi po përhapet edhe në Gjermani.
“Është shumë i rëndësishëm forcimi i bashkëpunimit mes vendeve sa i takon ‘udhëtimit të sigurt’. Për Gjermaninë, vendet e Ballkanit Perendimor tashmë janë zona me risk të ulët të përhapjes së Covid19. Por duhet parë me kujdes varianti Delta, i cili duhet thënë se po përhapet edhe në Gjermani”, tha Spahn.
