Së fundmi, ministrja e Shëndetësisë dhe Mbrojtjes Sociale, Ogerta Manastirliu, ka bërë me dije, nëpërmjet një statusi në Facebook, se sot kanë lënë Spitalin e Infektivit edhe 6 pacitentë të tjerë që janë shëruar nga COVID-19.
Kështu, referuar njoftimit, në total janë 31 të shëruar në vendin tonë, teksa Manastirliu u jep kurajo mjekëve që të vijojnë punën.
“Lajm i mire! Gjashtë pacientë kanë lënë sot spitalin infektiv të #shëruar nga #COVID-19. Deri tani 31 qytetarë e kanë fituar betejën me sëmundjen e vështirë. #FORCA ekipit të mjekëve të #Infektivit #BashkëJaDalim”, shkruan Manastirliu.
Sipas përditësimit të sotëm, në vendin tone ka shkuar në 186 numri i të prekurve nga COVID-19, pasi gjatë orëve të fundit janë testuar 102 persona, 12 prej të cilëve kanë rezultuar pozitiv, ndërsa në total janë kryer 1,246 teste.
Tek spitali Infektiv janë shtruar 77 persona, 5 prej të cilëve ndodhen në terapi intensive, teksa pjesa tjetër ndërkohë ndodhen në pavion dhe paraqesin gjendje të stabilizuar shëndetësore.
Harta e të prekurve tashmë është zgjerur edhe me qytetin e Pukës, teksa Ministria e Shëndetësisë përsërit thirrjet për qytetarët, që të telefonojnë në numrin 127 nëse kanë dyshime se janë prekur nga koronavirusi dhe mos të drejtohen menjëherë në spital.
Shpërndarja gjeografike e rasteve pozitive, është si vijon:
– Tiranë 107 raste
– Durrës 11 raste
– Lushnje 4 raste
– Elbasan 5 raste
– Rrogozhinë 2 raste
– Fier 20 raste
– Kavajë 4 raste
– Korçë 12 raste
– Vlorë 5 raste
– Shkodër 4 raste
– Lezhë 4 raste
– Berat 1 rast
– Has 2 raste
– Krujë 1 rast
-Tropojë 2 raste
– Pukë 2 raste
