Ditën e sotme ka nisur lehtësimi i masave në disa zona ku rreziku konsiderohet më i ulët, duke nisur nga ndryshimi i fashës së orarit për qytetarët, të cilët tashmë do të kenë në dispozicion të tyre 2 orë dhe deri tek lëvizja e automjeteve.
Sakaq, kanë nisur aktivitetin e tyre edhe disa biznese, që duhet të veprojnë mbi bazën e protokolleve të përcaktuara nga qeveria.
Mbrëmjen e sotme, ministrja e Shëndetësisë Ogerta Manastirliu tha se strategjia e hapjes e realizuar nga komiteti teknik është e bazuar në 4 faza të rihapjes.
Sipas saj, ne kemi aplikuar fazën e parë që është dhe më pak e rrezikshmja, ndërkohë që është vlerësuar rrisku i hapjes për secilën nga fazat.
Në një lidhje me Skype për “Opinion”, Manastirliu bëri të ditur se nëse në fazën e parë do të ketë një numër të caktuar të rasteve të reja nën një mesatare të caktuar, do të vijohet me fazën e dytë.
“Komiteti teknik ka realizuar një strategji të rihapjes në faza dhe ka vlerësuar 4 faza të rihapjes së aktiviteteve dhe në bazë të disa kritereve të vendosura, bazuar në kurbën, numin e të shtruarve dhe kurbën epidemiologjike dhe ka vlerësuar disa faza të hapjes”, tha Manastirliu.
Më tej, ministrja shtoi se çdo fazë ka kriteret e saj dhe nëse rastet rriten, atëherë do ndryshojë strategjia.
“Kemi kriteret e çdo faze të hapjes, kemi vlerësuar rriskun për secilën fazë. Rastet pozitive klasifikohen në disa aspekte që do të thotë nëse në fazën e parë do të kemi mbi 15 raste pozitive në ditë përmbi një mesatare të rasteve që është rreth 15 raste të reja në ditë, ne do të themi që do të vijojmë në fazën e dytë. Nëse numri do të rritet do të kalojë mbi mesatare nuk do të kalojmë në fazën e dytë, do të mbajmë frenat e emergjencës”, tha ministrja.
Ndërsa e pyetur rreth sezonit turistik dhe dasmave, Manastirliu tha se i pari vjen shëndeti i shqiptarëve.
