Komisariati i Policisë Mallakastër përfundoi një aksion antikanabis, pas një hetimi ku u përfshinë edhe përgjime me metoda aktive dhe speciale, duke goditur një tjetër rast kultivimi të bimëve narkotike dhe marrë nën akuzë deri tani 4 zyrtarë vendorë.
Policia e Fierit njoftoi se nën hetim janë 2 specialistë të Pyjeve dhe 2 kryepleq të fshatrave Lofkënd dhe Çyçen, ku u zbuluan parcela të kultivuara me bimë narkotike.
“Ndërhyrja u bë në kuadër të operacionit kombëtar “Territor i Pastër”, nga Komisariati i Policisë Mallakastër dhe u referuan materialet në Prokurori ku nisi procedimi penal për 4 shtetasit”, tha policia vendore. Të dyshuarit janë B. H., 63 vjeç, P. I., 61 vjeç, me detyrë specialistë pyjesh dhe H. S., 73 vjeç, kryeplaku i fshatit Lofkënd dhe G. S., 59 vjeç, kryeplaku i fshatit Çyçen. Ndaj tyre është ngritur akuza e “shpërdorimit të detyrës”.
Hetimet erdhën pasi nga kontrollet e territorit janë konstatuar në koordinata të ndryshme, në fshatrat Lofkënd dhe Çyçen, bimë të mbjella të lëndës narkotike kanabis sativa, e cila një pjesë u sekuestrua në cilësinë e provës materiale, ndërsa pjesa tjetër u asgjësua.
“Këta shtetas nuk kanë dhënë informacion në lidhje me koordinatat e mbjella me bimën narkotike”, tha policia.
Teksa po vijojnë hetimet për identifikimin dhe kapjen e personave të tjerë të përfshirë, kryesisht kultivuesve, pasi ngjarja është pa autorë.s
