Problemi i biletave për tifozët shqiptarë
Ndërsa Kombëtarja shqiptare përgatitet për ndeshjen e parë në eliminatoret e Kampionatit Botëror ndaj Anglisë në Wembley më 21 mars, vëmendja tashmë është e përqendruar te sfidat që do të zhvillohen në Tiranë. Çështja e biletave mbetet një problem shqetësues për tifozët, veçanërisht për ata që dëshirojnë të ndjekin ndeshjet në shtëpi.
Pas përballjes me Anglinë, Shqipëria do të luajë në “Arenën Kombëtare” ndaj Andorrës. Pavarësisht se ende ka bileta në shitje për këtë sfidë, kërkesa është tepër e lartë.
“Ne kemi tashmë fatin që tifozët nuk vijnë më për të parë ekipin kundërshtar, por për të mbështetur Kombëtaren tonë dhe për ta jetuar stadiumin si një eksperiencë,” u shpreh Aldi Topçiu, drejtor ekzekutiv i Federatës Shqiptare të Futbollit (FSHF).
Pse tifozët janë të pakënaqur?
Interesimi i madh për biletat ka krijuar pakënaqësi tek grupimet e tifozëve të organizuar si “Tifozët Kuq e Zi” (TKZ). Këta të fundit nuk mund të marrin bileta të grupuara, pasi FSHF ka vendosur një sistem të ri të shpërndarjes, duke limituar çdo aplikues në maksimumi katër bileta. Ky model është i ngjashëm me atë që përdor UEFA për turnetë e saj.
“Ne e kemi ndërprerë mënyrën e shpërndarjes së biletave në sasi të mëdha për grupe tifozësh, sepse besojmë që kjo krijon një padrejtësi në shpërndarjen e stadiumit. Kështu, më shumë njerëz kanë mundësinë të sigurojnë një biletë,” tha Topçiu, duke mbrojtur vendimin e FSHF.
Megjithatë, ky ndryshim ka shkaktuar debat, veçanërisht me grupin e tifozëve TKZ, të cilët tradicionalisht kanë siguruar bllok bileta për të krijuar atmosferën e tyre të zakonshme në tribuna.
FSHF garanton respekt për tifozët
Pavarësisht polemikave, drejtori ekzekutiv i FSHF tha se federata ka një vlerësim të madh për të gjithë tifozët e Kombëtares.
“FSHF vlerëson pamasë kontributin jo vetëm të tifozëve kuq e zi, por edhe të të gjithë tifozëve që kanë ardhur nga Europa për të mbështetur ekipin kombëtar në Tiranë, Elbasan, Shkodër dhe anasjelltas,” deklaroi ai.
Stadiumi do të jetë i mbushur ndaj Serbisë
Një nga ndeshjet më të pritura në kalendar është ajo ndaj Serbisë në qershor. Pyetjes nëse stadiumi do të ketë tifozë vendas, Topçiu iu përgjigj me siguri të plotë.
“Ajo që mund t’ju siguroj është se ndeshja e qershorit do të jetë ‘sold out’. I gjithë stadiumi do të jetë i ezauruar dhe të gjithë do të jenë aty për t’u sjellë si mikpritës të mirë, si shqiptarë të denjë,” tha ai.
Kur u pyet nëse tifozët shqiptarë do të kenë mundësinë të ndjekin këtë ndeshje nga stadiumi, ai konfirmoi: “Po, po! Nuk ka dyshim.”
Me këtë interesim të jashtëzakonshëm, duket se biletat për ndeshjet e Shqipërisë në eliminatore do të mbeten një “makth” i vërtetë për tifozët.
