EVU Albania organizoi sot një demonstrim live të një aksidenti rrugor provë, ku një makinë “përplasi” një biçikletë në mënyrë të kontrolluar para shumë qytetarëve në Sheshin Nënë Tereza.
Qëllimi i këtij eventi është sensibilizimi i shoferëve dhe qytetarëve për rëndësinë e respektimit të rregullave të qarkullimit dhe kujdesin në rrugë.
Alfred Hasanaj, drejtuesi i EVU Albania, shpjegoi se gjatë ditës do të zhvillohen edhe demonstrime të tjera, përfshirë përplasje midis makinave dhe mes makinës dhe motorit, me qëllim që të tregojnë pasojat reale të mosrespektimit të rregullave.
Ai theksoi se biçikletat shpesh ndryshojnë papritur korsinë e lëvizjes, diçka që Kodi Rrugor ndalon dhe që krijon rrezik të madh.
Në këtë test, makina provuese po lëvizte me shpejtësi 100 km/orë, shumë më tepër se ajo e lejuar në rrugë urbane, dhe gjatë përplasjes së simuluar të dy përdoruesit e rrugës kanë shkelur rregullat e qarkullimit.
Demonstrimi u zhvillua nën vëzhgimin e Policisë Rrugore dhe me praninë e një ambulance, për të treguar mënyrën e trajtimit të një aksidenti real.
Qëllimi i këtyre veprimeve është të rrisë ndërgjegjësimin e shoferëve dhe përdoruesve të rrugës për nevojën e respektimit të ligjit dhe kujdesit maksimal për të parandaluar tragjeditë rrugore.
