Sekretarja e përgjithshme e Këshillit të Bashkëpunim Rajonal Majlinda Bregu, në një komunikatë ka theksuar se numri më i madh i ngacmimeve ndaj grave në internet ndodh në rrjetet sociale.
Janë qeveritë ato që duhet të marrin masa nëpërmjet kuadrit ligjor që të ndalojnë ngacmimet përmes internetit.
Këshilli për Bashkëpunim Rajonal shpreh gatishmërinë që të ndihmojë qeveritë në rajon për të adresuar çështjen e ngacmimeve ndaj grave në internet.
“Numri më i madh i ngacmimeve ndaj grave në internet po ndodh në rrjetet sociale dhe këto rrjete përdoren çdo ditë nga 45% e qytetarëve të Evropës Juglindore. Qeveritë duhet të marrin seriozisht kuadrin ligjor për të ndaluar ngacmimet në internet pa kompromentuar lirinë e fjalës,” -tha Bregu.
Kujtomë se Komisioni Evropian kohët e fundit nisi një fushatë të quajtur “Respekti digjital për ato” me qëllim të ngritjes së vetëdijes për ngacmimin ndaj grave në internet dhe promovimin e praktikave më të mira në luftimin e këtij problemi.
Këshilli, si pasardhës i Paktit të Stabilitetit për Evropën Juglindore, ka si qëllim ndihmën në rritjen e bashkëpunimit mes vendeve të Evropës Juglindore.
“Dhuna në internet mund të shkaktojë vështirësi psikologjike, seksuale dhe ekonomike. Mund të heshtë gratë dhe zvogëlojë praninë e tyre në internet,” -thuhet në komunikatën e Këshillit Rajonal për Bashkëpunim.
