Ministri i Jashtëm i Spanjës, José Manuel Álvarez, bëri thirrje që bashkësia ndërkombëtare të shqyrtojë vendosjen e sanksioneve ndaj Izraelit për të ndalur luftën në Gaza.
Deklarata erdhi përpara samitit të organizuar në Madrid, ku do të marrin pjesë vende evropiane dhe arabe për të diskutuar situatën në rajon.
Álvarez theksoi se ndalimi i konfliktit është i domosdoshëm për të lejuar që ndihma humanitare të hyjë në Gaza në mënyrë të paanshme dhe pa pengesa.
Ai shtoi se në mungesë të kësaj ndërhyrjeje, Izraeli po vendos kush ka akses në ushqim dhe ndihma, duke krijuar një krizë serioze humanitare.
“Duhet të shqyrtojmë çdo mundësi, përfshirë edhe sanksionet, për të ndalur këtë luftë,” tha ministri për radion France Info.
Pas përshkallëzimit të operacioneve ushtarake në Gaza dhe bllokadës së gjatë dy-mujore që ka shkaktuar mungesa kritike në ushqim, ujë, karburant dhe ilaçe, presioni ndërkombëtar për një zgjidhje po rritet.
Organizatat humanitare paralajmërojnë për rrezikun e urisë dhe theksojnë se ndihmat e lejuara kohët e fundit nga Izraeli nuk mjaftojnë për të përmbushur nevojat urgjente të popullsisë.
Në samitin e Madridit marrin pjesë 20 vende, përfshirë përfaqësues të vendeve evropiane si Britania, Gjermania, Italia, si dhe vende arabe si Egjipti, Jordania, Arabia Saudite dhe Turqia.
Po ashtu janë të pranishëm përfaqësues të Lidhjes Arabe dhe Organizatës së Bashkëpunimit Islamik, ndërsa vende si Irlanda, Islanda, Norvegjia, Sllovenia dhe Brazili janë gjithashtu pjesëmarrës.
Ministri i Jashtëm francez, Jean-Noel Barrot, i cili pritet të takohet me homologun palestinez në Jerevan, nënvizoi rëndësinë e ushtrimit të një presioni të koordinuar për arritjen e një armëpushimi, lejimin e ndihmës humanitare në Gaza dhe lirimin e pengjeve.
