Lumbardh Dellova, qendërmbrojtësi kosovar, ka përpara një mundësi të madhe për të ndryshuar ekip dhe vazhduar karrierën diku tjetër në janar. Me dy vite shërbim te Ballkani dhe paraqitje të shkëlqyera me Përfaqësuesen e Kosovës, Dellova ka bërë “bujë” në tregun ndërkombëtar.
Gjiganti bullgar Ludogorets dhe New York City janë dy skuadra që kanë shprehur interesin e tyre me oferta zyrtare. Ludogoretsi ka ofruar 800 mijë euro, duke shpërblyer presidentin e Ballkanit, Arsim Kabashin. Megjithatë, oferta më e lartë ka ardhur nga New York City, që ka vënë në lojë afro 1 milionë euro dhe një pako bonuse.
Ballkani është i kënaqur me të dyja ofertat, por oferta e New York Cityt është më e favorshme financiarisht. Qendërmbrojtësi, 24-vjeçar nga Krusha e Madhe, me 26 ndeshje dhe dy gola këtë sezon, është në dilemë se ku do të vazhdojë karrierën: në qytetin e ëndrrave, New York, apo në Bullgari me Ludogoretsin.
Dellova ka nisur karrierën te Liria e Prizrenit, ka luajtur në Slloveni dhe Kroaci, por është rikthyer te Ballkani, duke fituar dy tituj kampion me këtë skuadër. Vendimi për ekipin e ardhshëm mbetet në dorë të tij.
